Por les sains Dieu, que voi je la ?
Et Diex vos saut, sire compere !
Bien ait l’ame vostre bon pere,
Dant Rohart, qui si seut chanter !
Mainte foiz l’en oï vanter
Que n’en avoit son per en France.
Vos meïsmes, en vostre enfance,
Vos en soulïez moult pener.
Seüstes onques orguener ?
Chantez moi une rotruenge.
Tiecelin entent la losenge,
Ovre la bouche, et giete bret ;
Et dist Renart : « Ce fu bien fet.
Miex chantez que ne soulïez ;
Encore, se vos voulïez,
Irïez plus haut une jointe. »
Cil qui de chanter se fait cointe
Conmence de rechief a brere.
Diex, dist Renart, con or esclere
Et con espurge vostre voiz !
Se vos vos gardissiez de noiz,
Au miex del monde chantissoiz.
Chantez encore une autre foiz.
De chanter velt avoir le pris,
Si l’a de rechief entrepris,
Si s’escria a haute alainne ;
Ainz n’en sot mot, que qu’il se painne,
Que le pié destre li desserre
Et li fromaches chiet a terre
Tot droit devant les piez Renart.
Li lechierres fremist et art
Et tout se frit de lecherie